Momento de facer balance

Pois si, penso que é un bo momento ou, cando menos, igual de bo que calquera outro. O ano pasado traballamos moi duro para lle dar forma ao primeiro volume da triloxía. Xa foi mediado Febreiro cando o texto e as ilustracións estiveron listas para metelas no prelo e que Sacauntos lle dera entidade física. Desde aí, e coa fame negra de facelo chegar a tódolos currunchos posibles, foi un non parar.

Non foron máis de cinco meses desde aquel 7 de Marzo no que fixemos a primeira presenta no Joana’s Place d’A Coruña e, sinceramente, parece que pasou media vida. Se botamos a vista atrás non é para menos xa que, ao tonto, logramos bater as escuras ás do noso corvo en moitos, moitos lugares:

-Joana’s Place (A Coruña)
-O Curral do Marqués (Taragoña)
-Livraría Suévia (A Coruña)
-A mediados de Abril aparecíamos na 5ª posición no Taboeiro do Libro Galego na sección de Narrativa
-Á lus do candil (Arteixo)
-Feira do Libro de Ferrol
-A finais de Abril acadábamos a 1ª posición no Taboeiro do Libro Galego na sección de Narrativa
-3º encontro da Nova Fantasía Galega na Feira do Libro de Compostela
-AAVV Atocha – Monte Alto (A Coruña)
-Feira do Libro de Lugo
-Libraría Carricanta (Betanzos)
-Libraría Cartabón (Vigo)
-Feira do Libro de Rianxo
-Outlet do Libro de Muxía
-Feira do Libro d’A Coruña

Como vedes, non está nada mal para pouco máis de cinco meses e, namentres, escrita a segunda parte (que xa está en revisión na editorial) e xa van case 100 páxinas da terceira e definitiva. Para o vindeiro mes comezaremos a currar no apartado gráfico do segundo volume que irá na mesma liña ca o primeiro: letra capital precedendo cada un dos capítulos (dez nesta ocasión máis unha sorpresa extra) e unha ilustración a páxina completa tamén para cada un deles.

Está claro, despois de tantos lugares diferentes, que houbos charlas mellores e peores, sitios cheos de xente e outros non tanto mais, o que si temos que agradecer, sempre contamos con alguén que se achegou a coñecer a Bran e a todos os personaxes que o acompañan nas súas Crónicas; sempre houbo quen preguntaba pola Señorita Curuxa ou polo Mestre Alquimista e tamén quen se declarou fan incondicional de Lord Daru ou os que gozaron da anárquica tolería dos trolls que atacaban a aldea de Landeiras.

Ás veces pregúntanme que como vai o libro, que se vendemos moito, que se está a funcionar… Se teño que ser sincero, non teño nin idea e supoño que a editorial tampouco (ou cando menos até que se faga a liquidación coa distribuidora) pero si que podo dicir que para min xa funcionou. Fíxoo no mesmo momento en que dous tolos confiaron en que esta historia merecía, cando menos, ser impresa e sacada ás librarías. E que dicir de todas e cada unha das persoas que están dentro deses locais e librarías que nos abriron as súas portas, sen eles tería sido inútil calquera tentativa de viaxe e promoción. Grazas a todos.

Mais a vida segue e hoxe mesmo imos falar da posibilidade de entrar no circuíto de charlas de este outono nas Bibliotecas Municipais d’A Coruña. E, por suposto, haberá que darlle á cachola para pensar que máis podemos facer durante este longo inverno que temos por diante antes de sacar o segundo libro… que aínda non somos famosos (nin tan sequera coñecidos) como para que nos veñan propor cousas a nós…

Charla na Libraría Cartabón

Este Venres 14 de Xuño fixemos unha visita a unha libraría que apostou (e apoiou) o proxecto Contos Estraños desde o seu primeiro número cero, alá xa polo inverno do 2.011. Fomos á Libraría Cartabón.

Saímos xustos d’A Coruña e tivemos que facer unha parada ‘técnica’ en Compostela co que chegamos a Vigo ás 19:15… Era Venres e última hora da tarde así que o tráfico estaba como estaba. A iso das 19:40 comecei a hiperventilar ao volante e decidimos meternos directamente nun parking. Unha vez deixamos o coche aparcado, chegamos á libraría e atopámonos con Fran Zabaleta ao que non víamos desde a Feira d’A Coruña do ano pasado (xa choveu…). Gustoume moito como ten Gonzalo a libraría. Moderna pero acolledora e, sobre todo, moi aproveitada e funcional. Era a miña primeira visita ao local, aínda que a miña irmá ten un piso pola zona e xa me tivera ao tanto da reforma. Saímos un ratiño á terraza de enfrente, tomamos unha birra fresca e volvimos á libraría para pórnos ao tema.

O certo é que non me esperaba tanta xente, foi unha gratísima sorpresa xa que as presentacións sempre son unha incógnita até que te sentas na mesa e arrancas coa charla. Seguín o meu “guión” habitual de contar un pouco de min e dos meus comezos en Contos Estraños, de explicar o tema, a ambientación e as fontes das que bebe a novela e rematei falando de quen somos os que logramos dar forma ao libro físico que vai parar aos andeis das librarías: a portada de José María Picón, as ilustracións de Kaiser, o meu texto, o traballo de Tomás, Ferny e David… todo iso xa me deu para estenderme durante case unha hora…

Para rematar, puiden disfrutar dese momento tan doce e que tanto me gusta que é asinar algún exemplar e inventar unha adicatoria personalizada…

Presentación na Libraría Carricanta

O pasado Venres 24 de Maio fixemos unha visita a unha cidade á que persoalmente gardo moito cariño (pola cantidade de fins de semana pasadas ao sol nas súas terrazas despois dunha ruta en moto ou polo seu corazón antigo, tan cheo de fermosos currunchos). Si, deixámonos caer por Betanzos e non podía ser a un local mellor que á Libraría Carricanta que acaba de abrir Carlos non fai moito.

Foi unha das presentacións na que tivemos máis xentiña e na que falamos máis detidamente do trasfondo místico da novela. Houbo moitas preguntas sobre celtismo, mitoloxía e de onde saía todo o simbolismo que agochan (e amosan nalgúns parágrafos) as páxinas destas Crónicas.

Como ven sendo habitual, falei sobre a orixe da novela e sobre os relatos curtos que, dalgún xeito, conformaron a semente do libro: ‘O ollo do corvo’ e ‘Os últimos de Landeiras’. Demos algunhas pistas sobre o segundo volume e suliñamos a importancia dos protagonistas no desenrolo da trama e por riba do xénero ‘fantástico épico’ do libro.

Feira do Libro de Lugo

Foi un Sábado de moita chuvia este que nos tocou pasar en Lugo. Chegamos ás 11:00 da mañá e, tras buscar sitio para aparcar (e desconfiar media hora de todas esas prazas sospeitosamente dispoñibles de carga e descarga…), entramos na Praza Maior para atoparnos coas sete casetas ‘agochadas’ nun dos laterais da devandita praza. O tempo non acompañaba pero é que Lugo estaba baleiro hoxe e a xente, que por aló quedaba, non fixo demasiado por achegarse até a Feira. Tan pronto entramos na área das casetas atopámonos, como non, con Gonzalo da Libraría Cartabón resistindo as inclemencias do tempo e a pasividade dos lugareños. Despois dunha agradable charla con él (e facer volver á vida a televisión que se negaba a proxectar os vídeos de promoción) xa nos xuntamos con Tomás González Ahola e David Cortizo que chegaban para preparar a presentación.

Foi un gustazo compartir de novo mesa con Ariza e Vanesa (aínda que botamos en falta a Fernando Cimadevila que tivo que atender outros compromisos) e escoitar e charlar de e sobre os nosos respectivos libros. Tamén foi un auténtico pracer coincidir de novo con José Estévez e coñecer “in person” a Puri Ameixide.

O tempo, como dicía antes, non acompañou e xusto no comezo da charla empezou a ventar e a chover con forza. A pesares diso, os asistentes aguantáronnos durante unha hora e aínda tiveron ganas de participar na quenda de preguntas onde falamos das nosas inspiracións, musas e do que desexamos transmitir aos lectores coas nosas historias.

Por sorte puidemos gozar do momento máxico de asinar un exemplar a alguén que se interesa por ler o que se nos dou por soñar e plasmar nun papel.

Presentación na AVV Atochas-Monte Alto

Este Xoves 16 de Maio, anteporta do Día das Letras Galegas, pasamos o serán coa xente da Libraría Sisargas, co creador do blogue “KindleGarten.es” e cos amigos e familia que se achegaron até a AVV Atochas – Monte Alto. Foi unha reunión que, sen darnos case conta, durou máis de unha hora e media e na que, ademais de falar moito de Bran, parolamos sobre as influencias que a historia (tanto a pasada como a que nos toca vivir a cada un de nós) ten nunha novela por moito de fantasía épica que esta sexa.

Conversando con Rober da Sisargas (máis ben case interrogados até que conseguiu o que procuraba…), profundizamos nas motivacións das personaxes da novela, na súa situación na historia e cales eran as razóns que as impulsaban a tomar un ou outro camiño o longo da trama. E así chegamos á conclusión de que nesta historia, como en calquera outra, a importancia da alma e o ser dos protagonistas é o que convirte en humano e próximo un conto escrito nun papel. E grazas a esa conclusión, Rober prometeunos que lle daría unha lectura a pesares de ser dun xénero que, a priori, non é dos que adoite ler.

Ademais, como colofón desa agradable tarde, tivemos o pracer de coñecer a Tomás (o artífice da web KindleGarten.es) que hoxe mesmo elaborou a primeira e completísima reseña da nosa novela. “Reseña en KindleGarten.es”